Cindy姐系公司股民团嘅领袖,一月份嗰阵佢操作得当,结果净赚咗好几万。但系呢排就唔掂啰,啲股仔、基金日日系噉跌,年头赚嘅全部蚀翻晒不单止,重要倒蚀好几万,搞到佢心情好鬼嘛嘛。
前几日大家喺度议论广州嘅禽流感,讲到啲鸡发瘟要扑杀。啱好佢喺外边返嚟,唔听头唔听尾,就喺听到“发鸡瘟”同“扑杀”几个字,即时不知几兴奋噉行过嚟搭嘴话:“啲死人基金唔系发瘟就假啰!系噉抛股票,个市就系噉样畀佢地抛冧嘅!唉,照噉睇,而家已经三千几,话唔定过多两日就两千点啦。到嗰阵,要搏杀都冇钱啦!”
听落就知Cindy姐搞错晒,以为我哋讲紧啲基金发瘟。冇计啦,办公室里面唔可以公开讲股票,所以养“基”(金)和养“鸡”系一个意思嘅,噉就难怪佢理解错啦。不过见佢讲得咁兴奋,我哋都费事打断佢,因为大家嘅心思都系差唔多。发鸡瘟可以唔食鸡,食猪肉、牛肉。但系手上啲股票、基金发瘟,噉就头痕啦!蚀本出局,你估个个都咁有勇气咩,嗰啲钱嚟口架!但系系噉守住,又几时先到唔跌反弹嗰日啊!做股民、基民真系痛苦啊!希望国家可以体谅一下,整多次“半夜鸡叫”,不过今次系降印花税就好啰!
